FITOS, CONQUISTAS E REFERENTES DO COLECTIVO LGBTIQA+

Outra das actividades previstas no Proxecta e desenvolvidas dentro do módulo de FOL co alumnado dos ciclos formativos de Administración e Finanzas, Sistemas de Telecomunicacións e Informáticos e Imaxe para o Diagnóstico (1ºA) foi a elaboración dunha presentación onde se compartise información sobre os fitos, as conquistas froito das loitas e as persoas referentes do colectivo lgbtiqa+. 

O obxectivo é a reflexión por parte do alumnado da loita do colectivo LGBTIQA+ polo recoñecemento duns dereitos que lles corresponden por nacemento, pero que a sociedade heteropatriarcal lles arrebata pola súa orientación ou identidade sexual. 

Que o alumnado entenda a violación de dereitos humanos que sofren as persoas non heterosexuais por algo que so lles corresponde a elas e á súa intimidade.

Esa recopilación de información debíase facer seguindo as instrucións dadas  pola profesora a través da aula virtual mediante unha tarefa e debían entregarse nun determinado formato.

As instrucións foron estas:

Unha vez entregada a tarefa, os arquivos enviados foron incorporados a un Google Earth para utilizalo como ferramenta de presentación do mesmo.

O resultado compartímolo premendo na seguinte imaxe:

OS MOVEMENTOS OBREIROS FEMININOS

O análise de 8 movementos obreiros protagonizados por mulleres foi unha das actividades estrella deste curso, por como se levou a cabo e a súa trascendencia.

Comezou sendo proposta como unha actividade de valores dentro do Módulo de FOL para alumnado dos ciclos superiores de Administración e Finanzas e 1ºA Imaxe para o Diagnóstico e Medicina Nuclear.

Nun primeiro momento creouse en Drive, onde o alumnado accedía a través dunha invitación de colaboración enviada pola profesora.

 

 

A estética non era axeitada, polo que o alumnado do grupo de Imaxe para o Diagnóstico refixo o traballo, esta vez na ferramenta CANVA.

Cando o traballo creativo e de análise de información estaba rematado, as alumnas prepararon os contidos para expoñelos na aula de 4ºESO, o grupo co que a profesora Leonor Giménez previamente estudara o Movemento Obreiro.

 

Foi unha experiencia moi positiva, e de cada traballo creouse un Código QR que se imprimiu con cada unha das portadas dos traballos para poder expoñer no hall do centro.

 

Premendo na seguinte imaxe pódese acceder á presentación dos traballos e ao contido de cada un deles.

 

SER TRANS

Que é a transexualidade? E que é a transfobia? A discriminación por razón de orientación sexual nos espazos públicos e no traballo........... 

Lola Pulleiro, antigua estudante do IES, impartiu uns faladoiros en 2º ESO i en 1ºA do CS de Imaxe para o Diagnóstico sobre a transexualidade, sobre os estereotipos que rodean á transexualidade, sobre burocracia e sobre transfobia. 

Este é o segundo ano que nos visita Lola, e por suposto agardamos a súa terceira visita para o próximo curso. 

 

 A DIVERSIDADE NO CENTRO

Co gaio do día contra a Lgbtbifobia (17 de maio) colocouse cartelería diversa no centro. Este ano centrámonos na diversidade das identidades, representadas a través das bandeiras. 

Colocáronse bandeiras por todo o teito do hall do edificio principal do centro.

Leonor Giménez, coordinadora da Biblioteca do centro, fixo a súa proposta de lecturas diversxs.

Proxectouse para 1º e 2º ESO o filme Carmen e Lola, a historia de dúas mozas lesbianas e da comunidade xitana. Rematada a película, propúxoselle ao alumnado unha ficha con preguntas sobre a pelí, centradas na temática lgbtiqa+ e na temática xitana.

Premendo na seguinte imaxe pódese acceder á ficha para traballar a película:

O CUESTIONAMENTO DA MASCULINIDADE HEXEMÓNICA E AS NOVAS MASCULINIDADES

Celso Taboada, axente de Igualdade no concello de Lalín, volveu ao centro para falar de novas masculinidades, e fíxoo nun ciclo formativo masculinizado, Instalacións de Telecomunicacións, onde 17 mozos e 1 moza, falaron da masculinidade hexemónica e do necesario de dar unha volta de 180 graos a esta construción patriarcal da masculinidade.

 

TRABALLANDO A PREVENCIÓN DA VIOLENCIA DE XÉNERO EN 2º ESO

Entre a materia de Igualdade de Xénero e a Titoría, varias foron as actividades que se desenvolveron en 2º da ESO previstas para traballar a prevención da Violencia de Xénero. Visonado de curtas, da película Figuras Ocultas e da película Chicas Perdidas, debate, lecturas e a participación no proxecto "Algo entre Nos", unha plataforma interactiva a través da cal se traballa a prevención da violencia de xénero como se fose un xogo, no que o alumnado debe ir superando retos (5 en concreto) e a través do cal xurde un debate que facilita a reflexión e o cuestionamento. "Algo entre nos" é outro dos recursos facilitados a través do Proxecta "Por 365 días...."

Dos debates tamén sairon algúns traballiños. Aquí o alumnado analiza os mitos románticos:

E aquí está a ficha coa que traballamos o filme Figuras Ocultas. Premendo sobre a imaxe pódese acceder á ficha:

 PROSTITUCIÓN E "COBARDES"

"Cobardes" foi a última lectura do Club de Lectura de Igualdade. A violencia machista exercida a través das agresións sexuais e da explotación do corpo da muller foron os fíos condutores desta actividade.

Para falar de Prostitución e de "Cobardes" visitaron o centro Mª Xosé Porteiro, xornalista, escritora, profesora e autora do libro do que estamos a falar, e Lili, psicóloga da asociación Faraxa.

Porteiro concedeunos previamente unha pequena entrevista dende a nosa emisora do centro, e logo, no Salón de Actos, Mª Xosé e Lili xa entraron en materia e falaron de mulleres prostituídas, de proxenetas e puteros. 

Participou alumnado de Bacharelato, do Ciclo Superior de Imaxe para o Diagnóstico (grupo 1ºA) e 2º ESO.

 

 DIVERSIDADE E "IDENTIDADE"

O 20 de abril visitou o centro Nee Barros, autor do libro "Identidade", unhas das lecturas do Club de Lectura de Igualdade traballadas este curso.

Nee estivo con Olga Nogueira, coordinadora de Normalización Lingüistica dos 3 Clubs de Lectura do centro e profesora de galego, na emisora do centro, onde contestou a unhas preguntiñas que lle formulou Olga.

Logo xa no Salón de Actos de centro falou co alumnado de 2º e 3º da ESO de Diversidade, de Transexualidade, de libros e de liberdade. Magnifica intervención de Nee.

 

O PAPEL DA MULLER NAS DIFERENTES CULTURAS

A celebración no centro da Semana das Culturas deu pe a realizar con alumnado de Ciclos Formativos a actividade "O papel da muller nas diferentes culturas". Os grupos participantes foron Administración e Finanzas, Sistemas de Telecomunicacións e Informáticos e 1ºA Imaxe para o Diagnóstico e Medicina Nuclear.

A través da aula virtual, como una tarefa calquera, colgáronse as instrucións para realizar este traballo, configurado para facer por parellas. A cada parella asinouselle un país. 

O resultado do traballo debía ser unha presentación realizada coa ferramenta CANVA. O resultado foi moi positivo, ao tempo que favoreceu o debate na aula e permitiu compartir certa información que resultou chamativa ou peculiar de determinadas culturas.

Posteriormente as portadas dos traballos imprimíronse xunto cun código QR que permitía acceder á presentación e colocáronse polas paredes da planta baixa do edificio principal do centro.

Tamén se imprimiron en cartón pluma para a súa exposición.

Aquí deixamos unha captura da tarefa da aula virtual e fotografías das impresións. 

 

 

 Para poder acceder ao contido dos traballos, so hai que premer enriba de cada unha das distintas nacionalidades (bandeira/s).

COLECTIVOS VULNERABLES

Por mor da dobre discriminación que sofren algunhas mulleres por pertencer a un colectivo vulnerable e ademais por ser muller, e a necesidade de crear e facilitar espazos inclusivos que garanten o trato igualitario entre as persoas, por enriba de xéneros e capacidades, a profesora de Educación Física, Susana Piñeiro, organizou un obradoiro de lingua de signos para o alumnado de 1ºESO que se desenvolveu a finais do mes de marzo.

Co obradoiro "SIGNAR NAS AULAS" unha persoa xorda especialista en lingua de signos e unha intérprete e formadora en LSE procuraron achegar a lingua de signos ao alumnado, e sensibilizalos co colectivo de persoas xordas e xordocegas e a súa cultura.

A actividade foi un éxito.

 

Outro colectivo que sofre moita discriminación son as persoas da etnia xitana, e as mulleres xitanas sofren a discriminación da etnia e do xénero da comunidade paia, e a maiores a discriminación por ser muller da súa propia comunidade. 

Co seguinte traballo "Muller, Xitana .... e Empoderada", elaborado dende o equipo de igualdade do centro, preténdese achegar referentes femininos ás alumnas xitanas, ao tempo de aproximar a cultura xitana a alumnado e docentes propiciando unha maior integración.

VIOLENCIA MACHISTA NAS RELACIÓNS DE PARELLA NA MOCIDADE

Rosa, Terapeuta Ocupacional do Centro de Recuperación Integral para mulleres que sofren violencia de xénero (CRI) foi a persoa encargada de impartir a charla do Proxecta "Violencia de xénero nas relacións de parella na mocidade". Rosa falou da frustración, de como xestionar as emocións negativas, do coidado mutuo, de compartir e de respectar. Un faladoiro moi necesario e positivo.

Participaron na mesma alumnado do CM de Instalacións de Telecomunicacións así como alumnado de 1ºA do CS Imaxe para o Diagnóstico e Medicina Nuclear. 

 

"CARTAS DE AMOR"

A exposición "Cartas de Amor", outro dos recursos que facilita a Xunta co Proxecta "Por 365 días...." estivo no centro durante o mes de marzo, entre os días 11 e o 24.

Son 15 paneis nos que se mostran escenas de violencia moi presentes na vida cotiá, moitas delas normalizadas nas relacións de parella.

8-M NO CENTRO

Unha constante no centro é visibilizar as datas máis significativas do calendario escolar. O 8 de marzo é unha desas datas, nas que se elabora cartelería diversa para resaltar ese día. Este ano centrouse na eliminación de estereotipos e roles de xénero, a fin de garantir a igualdade para as nenas e as mulleres nos seus itinerarios formativos e carreiras profesionais, e para iso elaboráronse ilustracións de nenas facendo mención do que serían de maiores.

Tamén se elaborou un vídeo coas ilustracións, e para a entrada do instituto fíxose un cartel con todos os meses do ano marcando o 8M en cada un dos días. O lema "Por 365 días 8M"

 No vídeo no que se proxectan as ilustracións, así como novas de loitas femininas no eido laboral, intercálanse ilustracións con frases feministas elaboradas polo equipo de igualdade do IES Politécnico de Vigo.

 

A VIOLENCIA MACHISTA NO EIDO DO TRABALLO

Nas contornas laborais a violencia machista tamén está presente. Exércese todos os días sobre as mulleres a través da Fenda Salarial, do Teito de Cristal, da discriminación por ter cargas familiares, das dificultades para conciliar e a través do acoso sexual e do acoso por razón de xénero ou sexo. 

Tampouco podemos esquecer a dobre discriminación, a que sobren as mulleres lesbianas, negras, musulmás, xitanas, as mulleres con algunha discapacidade e as mulleres transexuais. Todas sofren, engadida ás discriminacións mencionadas, a de ser muller.

Para falar de fenda salarial, precariedade laboral feminina, traballos feminizados, e acoso sexual no traballo estivo no centro Esther Marinho, sindicalista da CIG, que impartiu dous faladoiros co alumnado de 1º curso dos ciclos formativos medios e superiores de administración, electrónica e sanitaria.

 

MULLER E NENA NA CIENCIA: VISIBILIZANDO REFERENTES

A ausencia de referentes femininos na ciencia é consecuencia das violencias machistas exercidas polas familias e/ou a sociedade sobre mulleres de ciencia cuxos traballos foron invisibilizados ou usurpados por varóns do seu entorno. 

Devolver o lugar público que lles corresponde a esas mulleres, recoñecer os seus traballos e atribuírllelos, e visibilizalas a elas como científicas, con igual consideración que os seus compañeiros varóns, ademais dunha débeda que temos como sociedade, é unha maneira de achegar referentes femininos ás aulas para fomentar a cultura científica entre as nenas e mozas, i equilibrar a presenza de mulleres nos estudos de ciencia.

Varias foron as actividades que se desenvolveron este ano no centro para traballar o "empoderamento científico feminino", para achegar referentes ás alumnas e para difundir e promover o interese pola ciencia.

1º. OBRADOIRO con 3º ESO SOBRE MICROPLÁSTICOS e a súa repercusión no medio mariño, impartido por dúas científicas do CSIC de Vigo.

 

 Botando man da gamificación, e coa axuda do departamento de Orientación do Centro, elaboráronse varios xogos en formato dixital e tamén en papel, que logo se difundiron entre o profesorado para traballar nas aulas, durante as titorías, ou de xeito trasversal nas súas materias.

2º. PASAPALABRA DE CIENCIA 

 

 

3º. XOGOS DE CARTAS DE CIENTÍFICAS

Familias de Ciencia. Xogo de cartas que, seguindo a metodoloxía de xogo de cartas das familias tradicional, as persoas que participan deben reunir as cartas que integran cada familia. As familias son ramas da ciencia (Bioloxía, Matemáticas, Química, Física....) e as persoas que integran as familias, son mulleres científicas

O Memori Científico. Xogo de cartas no que hai que unir parellas. Esténdense todas as cartas agochadas enriba dunha mesa, e no turno de xogo a persoa que lle toca levantar cartas debe levantar 2 cartas intentando formar parellas. A parellas fórmanas a científica e o seu descubrimento ou disciplina.

A VIOLENCIA DE XÉNERO NA PUBLICIDADE E NOS MEDIOS DE COMUNICACIÓN

 

A VIOLENCIA DE XÉNERO NA PUBLICIDADE E NOS MEDIOS DE COMUNICACIÓN.

En xaneiro levouse a cabo un faladoiro sobre "O tratamento da violencia de xénero na publicidade e nos medios audiovisuais". Trátase dun dos recursos formativos que proporciona o Proxecta "Por 365 días de Respecto e Igualdade" para traballar a prevención da Violencia Machista, que nesta ocasión desenvolveuse co C.S. de Administración e Finanzas. 

O faladoiro foi impartido por Gela G. Sánchez-Albornoz, consultora de xénero e políticas de igualdade, e falou do papel da muller na publicidade e no cine, da sexualización do corpo da muller nos medios de comunicación e da contribución dos medios audiovisuais á perpetuación dos roles e estereotipos de xénero.